(此故事僅為杜撰,如有雷同實為巧合)
【壹】
月夜。
珠江長堤。
「鳳蓮,乜今日咁晏嘅?」
「冇計啦昌哥,大少奶今日喺大院度搞壽宴,請咗好多客人嚟呀!我都係啱啱完席咗洗完碗先可以偷偷鼠出嚟咋!」
「睇下妳呀,上氣唔接下氣咁,唞順條氣先啦。嗱,趁妳而家憩緊,闔埋雙眼先吓,我有嘢送畀妳。」
「咩嚟0架?神神秘秘咁,唔好撚化我喎!」不過話係咁話,鳳蓮都係乖乖咁瞇埋對眼。
成昌輕輕將自己親手雕刻嘅鳳凰躍飛蓮池之上嘅木牌戴喺鳳蓮條頸上,然後捉住鳳蓮雙手牽引佢觸碰塊木牌。
鳳蓮摸到塊木牌,好奇之下忍唔住張開眼睇下成昌送咗啲咩畀自己,低頭一睇原來係一塊雕刻得栩栩如生嘅木牌,上面嘅圖像仲象徵住自己嘅名,不禁因驚喜及感動而投入成昌的懷抱緊緊抱擁。
呢個時候,長堤邊響起咗疍家女叫賣艇仔粥嘅吆喝聲,成昌同鳳蓮循聲望向江邊,見到有條小艇正慢慢駛近,成昌對鳳蓮講:「我諗妳都肚餓0架啦呵?不如買碗艇仔粥過妳做宵夜呢?」
「咁你呢?」鳳蓮好奇咁問。
「我?我唔餓呀。」成昌回答話。但話雖如此,佢個肚打鼓咁聲出賣咗佢,鳳蓮見此忍唔住偷笑,成昌尷尬到面都紅埋。
兩個人喺疍家女處買咗兩碗艇仔粥,坐喺長堤邊望住滿天星辰你一啖我一啖咁喂起對方食粥。
【貳】
「昌哥!昌哥!」嘭嘭嘭嘅拍門聲令瞓緊晏晝覺嘅成昌緊緊忙忙走去開門睇下係邊個搵佢,一睇,原來係鳳蓮。
「咩嘢事呀蓮妹?」
「昌哥,我,我,我有咗呀!」
「咩話?妳講真嘅?」成昌聽到之後好激動,即時踎低手扶鳳蓮條腰將隻耳貼喺鳳蓮個肚度想感受下蘇蝦嘅郁動。
鳳蓮即時摸摸成昌個頭嗔笑道:「哎呀,傻人,邊有咁快識郁呀我哋個細路。」
然而過咗輪鳳蓮摸住繼續喺度聽肚裏面個蘇蝦仔郁動嘅成昌嘅頭自言自語咁喺度講:「個肚越嚟越大,呃唔到幾耐0架喎,到時點算呀?」
成昌聽到鳳蓮所講嘅嘢,企返起身,以堅毅嘅眼神望住鳳蓮話:「唔使擔心,我一定會照顧妳哋兩仔乸嘅!」
【叁】
可惜,已經係喺兩個月之前嘅事啦。
民國廿七年國慶節過咗冇耐,廣州就已經淪陷咗。而此前嗰個零兩個月,啲達官貴人已經收到風,紛紛離開省城。鳳蓮係喺半夜被人嗌醒隨大少奶一家漏夜搬走嘅,所以連同成昌哥告別嘅機會都冇。
日軍入城之後進駐省城,皇軍姦淫擄掠無所不作。成昌匿埋咗個零月後被日本兵捉住咗,拉咗去做勞工。
有一日,佢被派咗去萬人坑度幫手填土,填到半,運咗車新屍過嚟,全部係衣不蔽體嘅女屍。喺將車女屍倒入坑內時,成昌發現女屍堆最上面嗰具女屍背上有一塊熟悉嘅木牌,佢馬上衝上去將嗰具女屍翻轉過嚟.。
果然係鳳蓮!
然而下體赤裸嘅鳳蓮仲要俾人開膛破肚取咗個未足月嘅佢哋兩個嘅蘇蝦走!
成昌當堂成個人崩潰,攬住鳳蓮條屍仰天長嘯。悲痛、憤怒此刻填滿佢心口。
然而兇殘嘅日本兵見到成昌唔守規矩發癲咁撲埋條屍度,即刻一槍打埋去,打中成昌膊頭。
受傷嘅成昌原本踎喺坑邊,因失平衡而跌入坑裏面昏迷不醒,其他勞工則被強迫繼續將其他屍體倒入去坑度填滿佢。
【肆】
成昌半夜痛醒咗,笮喺一堆屍體下嘅佢懷著家仇國恨一邊忍住痛一邊竭力爬出萬人坑。勝在冚喺佢之上嘅屍體唔算多,成昌最終爬出萬人坑,并成功逃離,尋找地方匿藏。
成昌實在好彩,俾佢遇見東江縱隊嘅成員並被帶走救活。康復後嘅成昌順理成章咁成為咗縱隊嘅其中一員。
【伍】
抗戰終於結束咗啦,但冇諗到都未安定落嚟,咁快又打起內戰,成昌遂縱隊編入咗解放軍,但參加抗日嘅經歷卻成為政治運動中被打倒嘅原因。不過由於韓戰嘅突然爆發,軍隊唔夠人用,成昌被送往朝鮮前線做馬前卒。
犧牲咗三廿萬人,僅僅為保住姓金嘅政權。不過成昌都算命大,竟然有命喺戰場上返嚟。但喺嗰個年代嘅嗰個地方,活著比死去更痛苦,因為無論係為國家而戰抑或為政權而戰,成昌曾經嘅經歷已經成為佢嘅一個不可摘掉嘅標籤,令佢喺五、六十年代不得不背負住黑五類嘅帽子做人。
【陸】
撐得過抗日,撐得過韓戰,甚至大躍進後靠食樹根都忍住冇食人肉嘅成昌最後卻敵不過一班戴紅袖章、揸毛語錄嘅紅衛兵。
武鬥時期,成昌最後一日嘅經歷見錄如下:
「叛徒楊成昌勾結階級敵人罪名成立,判處槍斃,即時執行。」
靜默無言嘅成昌心中暗唸:「鳳蓮、蝦仔,我哋好快可以團聚啦……」
一聲槍響,跪向山頭刑場嘅成昌望住夕陽落山,緩緩地向前仆低。